أنا آسف ما تزعلش
تأليف/ حازم بنه ..... 24/8/2012مإهداء إلى زوجتي الغالية صاحبة فكرة القصيدة
أنا آسف ... حقّك عليّا ... لا مؤاخذة ... معلـش
كلمة بسيطة بتريّح وتهدّي وتِرضي ولا تكلّفش
إيـه المانـع لـو الغلـطـان يقولهـا ومـا يـزرجـنـش
مش كبيـرة ولا صعبـة ولا بتقلّـل وما بتصـغـّرش
دي بترضي النفـوس وترجّع المحبـة جوا العِـش
بلاش عنـاد ومكابـرة لو غلطـان ليه ما تتنازلـش
لو غلطـان لوالـديـك روح بـوس الرجليـن والـوش
أو غلطان مع حد من إخواتك إوصل ولا تقطعـش
أو شريك حياتك أو عيـالك راضيهـم ولا تبهدلـش
أو حتى حد من جيرانك حافظ عليه ما تتهاونش
ولا حد من صحابـك أو زمايلـك لاقـي ماتضربـش
وأي حد ما تعرفوش لازم يسامحك ما تكشّـرش
ياصاحبي عيب تغلط في حد وكمان ما تعتذرش
ياعم إعقل دي كلمة حلوة ببلاش وما بتندفعش
راضـي النـاس يراضـوك مافيش حد ما بيغلطـش
مرة عليك ومرة ليك يعني خد وهات ما تبخلـش
كل واحد له كرامة وقانون الغابة أبداً ما بينفعـش
لسانك حصانك والكلمـة لو خرجـت ما بترجعـش
والإيد لو إتمدّت بالغلط حبل المـودة ما بيكمّلـش
إزرع خيـر تلاقيـه وإوعـا يا صـاحبـي مـا تـزرعـش
أو تفتكر إنك هتفضل تحصـد من غير زراعة ورش
نصحتـك يـا صاحبـي وإوعـا تطلـع مـا بتسمعـش
أو تقول ماحـدش قال لي أو لنفسك مـا تقولـش
هوّنها تهون وخليـك جـدع وللنـاس ما تخسـرش
وآخر كلامـي لو أنا غلطـان لحد بأقول له معلـش
عاوز كل واحد يسامحني لو غلطت وما يزعلـش
عاوز أبعد عن النار وأجري وللشيطان ما نقرّبـش
وأخلّص ذمتي فِالدنيا عشان للجنة أعرف أخُـش
وإذكر ربـك دايماً وصلـي على النبـي ما تبطلـش
آخرتها متر في متر بس العمل الطيب ما بيرُحش
الخير بيسافر بلاد ويطير بصاحبه وأبداً ما بينزلش
والشر بيغرز ويضيّع معاه السُمعة والجاه والقرش
مواضيع ذات صلة :
كتبت تحت قسم :
كاتب ومقال
